الجمعة، 30 سبتمبر 2011

هي مصر عنوانها إيه ؟؟

" مصر التي في خاطري
 و في دمي " !!
لكن يا مصر
إن كان و دمي مش نضيف
هاتروحي فين ؟؟؟
والله يا مصر
أنا كل أسبوع
باغسله بالمرتين !!
مريض كِلى ...
قولي صحتي مش مشكلة
إبنك أخد ع البهدلة
لكن انتي يا مصر إنتي !!
إن كان و دمي مش نضيف
هاتباتي فين ؟؟؟!

و خصوصا اني سمعت إنك
زينا مش لاقية شقة
يعني مش إبنك لوحده
اللي انتهى
لأ د احنا فرقة
مش لاقية دم ولد سليم
تتاوي فيه ؟؟؟!
و لا عاد خلاص ابن البلد
تتحامي بيه ؟؟

ده القضية طلعت اكبر م الكلاوي
شوفي إنتي و دَوَّري
و بلاش نكتر ف الحكاوي
مش بس كِلية
و مش هاعِّد
أصل البلاوي ما ليها حصر
مابقاش في دم نضيف
تعيشي فيه يا مصر

الخميس، 29 سبتمبر 2011

الفرح فكرة


غمض عينيك
شوف إيه اللي يجرى
إرضى برسمة لدنيتك من غير رتوش
و افرح لذنب
رموه عليك
ماعملتهوش
عري الحقايق
م الدقايق و الزوايق
و النقوش
إرسم مدينتك
ع المخادع و الشوارع
و المنابع و الوشوش
إشتاق لحد حلمت بيه
و بديهي جدا لا تلاقيه
و لا تشوفوش
إلا ف قصيدة أو ف فكرة
غمض عينيك
شوف ايه اللي يجرى

غمض عنيك ع الدنيا بس افتح حواسك
لملم بقايا الذكرى من تحت رجلين
اللي داسك
حطها ف متحف بعيد
توه عن مكانه و لا تزوروش
إسأل عناد فارس عنيد
عمق الحياة
جوا اللي مات ولا همهوش
إسأل غريق رغم الوفاة اتبقى حي
و الجسم يتحلل ...
يبووووش
ده الموت ف شوف
شاف الألوف
و رغم نظره
لسه نفسه عنده نكره
غمض عنيك
شوف ايه اللي يجرى

إنقذ بذور الفرح
من وسط اشواك الالم
داوي الحزين اللي انجرح
قوي الضعيف اللي انهزم
إزرعها و ارويها بعطشك
و اجرح ايديك ويا القدم
اروي الغروس جوا النفوس
و انت ارتوي حيرة وندم
جرح الايدين راح يسوى إيه
لو تحيي نفس اللي اتعدم
لو تحمي يد من العجَز
لو تبني صرح اللي اتهدم
لو جت على الروح و النفَس
اهي ماشية و انت تحب تكره ??
العيشة واحدة
الفكرة ف اللي بيعشوها
إيه اللي فاتك ??
خش الميدان
اتحدى ذاتك
غمض عنيك
ده الفرح فكرة